غزني کې د مالدارۍ د پرمختګ په موخه روزنیز پروګرام ترسره شو
۲۲ لیندۍ ۱۴۰۴ هـ.ش
۲۲ جُمَادَى الثاني ۱۴۴۷ هـ.ق
د غزني ولایت د کرنې، اوبولګولو او مالدارۍ ریاست له لوري د مالدارۍ د سکتور د پیاوړتیا او د حیواني تولید د لوړولو په موخه روزنیز پروګرام ترسره شو، چې پکې د حیواني فارمونو ښه مدیریت، د مصنوعي القاح لارې چارې، د غواګانو د نسلګیري عصري تخنیکونه او حیواني تغذیه ګډونوالو ته تشریح شوه.
یاد روزنیز پروګرام د غزني ولایت د مرکز او د قرهباغ، اندر او دهیک ولسوالیو څخه د ۱۲۰ تنو ګډونوالو په ګډون ترسره شو، چې د هرې سیمې څخه ۳۰ تنه د مالدارۍ له برخې سره تړلي اشخاص، فارمداران او د سیمو استازي پکې شامل وو.
په دې روزنه کې د مسلکي روزونکو له لوري د څارویو د سالم روزنې، د تولید د زیاتوالي، د نسل اصلاح او د معیاري تغذیې په اړه هر اړخیز معلومات وړاندې شول.
ګډونوالو د دغه روزنیز پروګرام څخه خوښي وښوده او ژمنه یې وکړه، چې ترلاسه شوې پوهه او تخنیکونه به په عملي ډول په خپلو فارمونو او سیمو کې تطبیق کړي، څو د مالدارۍ سکتور لا وده وکړي.
