روزګان کې له ۳۰۰ کروندګرو سره مرسته؛ ۶۰۰ کندوان، نغدي ملاتړ او نورې کرنیزې اسانتیاوې ورکول کېږي

۲۰ لیندۍ ۱۴۰۴ هـ.ش
۲۰ جُمَادَى الثاني ۱۴۴۷ هـ.ق
د  روزګان په ولایت کې د کرنې، اوبولګولو او مالدارۍ ریاست په همغږي د سره صلیب نړۍوالې کمېټې (آی سي آر سي) له لوري له ۳۰۰ کروندګرو سره د غنمو او اوړو د خوندي ساتلو ۶۰۰ کندوان ووېشل شول، او تمه ده چې په راتلونکو ورځو کې ورته د غنمو د رېبلو ۶۰۰ ماشینونه، د باران ضد ۶۰۰ ترپالونه او دوه زره افغانیه نغدې مرسته هم ورکړل شي.
د  روزګان په ولایت کې د کرنې، اوبولګولو او مالدارۍ ریاست چارواکي وایي، چې په دې ولایت کې د کروندګرو د ملاتړ یوه مهمه پروژه عملي شوه. د دې پروژې له مخې له ۳۰۰ کروندګرو سره د غنمو او اوړو د خوندي ساتلو لپاره ۶۰۰ کندوان ووېشل شول، څو بزګر وکولای شي خپل تولیدات د ضايعاتو له خطره وژغوري. مسؤلین وایي، چې په راتلونکو ورځو کې به ورته ۶۰۰ د غنمو د رېبلو ماشینونه، ۶۰۰ د باران ضد ترپالونه او دوه زره افغانیه نغدي مرسته هم ورکړل شي.
د روزګان د کرنې رییس مولوي عطاالله راشد په خبرو کې وویل: «موږ به په دې ولایت کې کروندګر په مسلکي ډول وروزو، څو هغوی وکړای شي په معیاري توګه کرنه وکړي او د خپلو حاصلاتو کچه لوړه کړي.»
مولوي راشد زیاته کړه، چې ډېری کروندګرو د دې مرستو له ترلاسه کولو خوښي څرګنده کړې ده او لا یې د اصلاح شوو تخمونو غوښتنه کړې، څو د راتلونکي کرنیز فصل لپاره د حاصلاتو کچه لوړه کړي.
دا مرستې په داسې حال کې ترسره کېږي، چې شاوخوا یوه میاشت وړاندې هم د سره صلیب نړۍوالې کمېټې له لوري په دغه ولایت کې له ۹۷۰ بزګرانو سره د ۲۵ زره افغانیو نغدي مرستې شوې وې، چې له لارې یې د روزګان ګڼې کرنیزې کورنۍ ملاتړ شوې وې. 
روزګان د افغانستان له هغو ولایتونو څخه دی، چې ډېری خلک یې په کرنه او مالدارۍ بوخت دي. جګړې، اقتصادی شرایط، د کرنیزو وسایلو نشتوالي او د کروندګرو د مسلکي روزنې کمښت د دې ولایت د کرنیز سکتور لپاره ګڼې ننګونې رامنځته کړې دي. د سره صلیب نړۍوالې کمېټې په ګډون بېلابېلو مؤسسو په دې سیمه کې د کرنیزو فعالیتونو د پیاوړتیا لپاره مرستې پیل کړې دي، چې موخه یې د تولیداتو خوندي ساتل، د حاصلاتو ضايعات کمول او د بزګرانو اقتصادي ملاتړ دی.