فراه ولایت کې د یوریا سپرې کمپاین پیل شو

د فراه په ولایت کې د یوریا سپرې کمپاین پیل شو. یاد پروګرام د کرنې، اوبولګولو او مالدارۍ وزارت د بوټو ساتنې او قرنطین ریاست د پلان پر اساس، د دې ولایت د کرنې،ابولګولو او مالداری ریاست د بوټو ساتنې مسلکي کارکوونکي له خوا بڼوالو ته د یوریا سپرې د سم استعمال عملي روزنه او د آفتونو او نباتي ناروغیو د میخانیکي مبارزې طریقې ورښيي، څو د دوی تخنیکي وړتیا د آفتونو د پېژندلو او کنټرول په برخه کې لوړه شي.
ټاکل شوې، چې یاد کمپاین به د دي ولایت مرکز، اناردره، شیب کوه او پشت کوه په ولسوالیو کې پلي شي او سلګونه بڼوال به د مسلکي زده کړو څخه ګټه ترلاسه کړي. همدارنګه، د کمپاین په ترڅ کې زرګونه مېوه لرونکي ونې د وقایوي تدابیرو لاندې راوستل کېږي، څو له آفتونو او بېلابېلو نباتي ناروغیو  خوندي پاته شي.
د یاد کمپاین اساسي موخې د بڼوالو وړتیاوې لوړول، د آفتونو او ناروغیو له امله د زیانونو کمول، د بڼونو ساتنه او د حاصلاتو زیاتوالی دي.