ننګرهار کې د دوه میلیونه ډالرو په لګښت د غوړیو ستره کارخونه پرانیستل شوه؛ سلګونو کسانو ته د کار زمینه برابره شوه
۱۷ لیندۍ ۱۴۰۴ هـ.ش
۱۷ جُمَادَى الثاني ۱۴۴۷ هـ.ق
په ننګرهار ولایت کې د المعیار په نوم د غوړیو او کنجاړو ستره تولیدي فابریکه رسماً په فعالیت پیل کړی، چې د تیلي نباتاتو د پروسس لوړه وړتیا لري او د افغانستان د کرنیز صنعت او اقتصادي پیاوړتیا لپاره یو مهم ګام بلل کېږي.
دغه کارخونه په شیخ مصري صنعتي ښارګوټي کې د یو افغان پانګوال له لوري د دوه میلیونه امریکایي ډالرو په لګښت د المعیار په نوم پرانیستل شوه. د ننګرهار د کرنې، اوبولګولو او مالدارۍ رییس مولوي محمد ولي محسن د کارخونې د لیدنې پر مهال د کارخونې مسؤل انجینر نقیبالله احساس د فابریکې د فعالیت او امکاناتو مفصل معلومات وړاندې کړل.
انجینر احساس وویل، چې دغه کارخونه په ۲۴ ساعته تولیدي جریان کې د ۲۰۰ ټنه تیلي نباتاتو د پروسس وړتیا لري. د نوموړي په وینا، سویابین، زغر، لمرګل او کنوله یې اساسي خام مواد دي، چې ډېره برخه یې د کورنیو تولیداتو له لارې برابرېږي. هغه زیاته کړه، چې د پاکستان سره د سوداګرۍ د بندېدو په شرایطو کې هڅه کوي د چرګانو د دانې تولیدوونکو کارخونو ته د اړینو غوړیو او موادو عرضه منظمه وساتي ترڅو د مرغدارۍ سکتور له ستونزو سره مخ نه شي.
انجینر احساس همدارنګه وویل، چې ډېر ژر به د لوړ کیفیت کورني غوړي بازار ته وړاندې کړي. نوموړي د ننګرهار د کرنې ریاست رییس سره ژمنه وکړه چې راتلونکی کال به د سویابینو د تولید د پراخېدو په موخه لس زره بزګرانو ته اصلاح شوي تخمونه او کیمیاوي سرې ووېشي، خو په دې برخه کې یې د کرنې ریاست څخه د همکارۍ غوښتنه وکړه.
مولوي محمد ولي محسن د کارخونې پر جوړېدو خوښي وښوده او د فابریکې مسؤلینو ته یې د تیلي نباتاتو د تولید، تخنیکي چارو او اړوندو برخو کې د بشپړې همکارۍ ډاډ ورکړ. هغه زیاته کړه، چې د کرنې ریاست هڅه کوي د بزګرانو او مالدارانو د پیاوړتیا لپاره تمویل کوونکي پیدا کړي ترڅو بزګران په اقتصادي برخه کې پر ځان بسیا شي.
د یادې کارخونې په فعالیت سره سل کسانو ته مستقیم او په زرګونو نورو ته غیرمستقیم د کار زمینه برابره شوې ده، چې د سیمې د اقتصاد په پیاوړتیا کې مهم رول لوبوي.
ننګرهار په ختیځ زون کې د کرنیزو محصولاتو، په ځانګړي ډول د تیلي نباتاتو یوه مهمه تولیدي سیمه ګڼل کېږي. په وروستیو کلونو کې د کرنې وزارت د کرنیزو محصولاتو د پروسې، بدیلو کښتونو د ترویج، او د داخلي تولیداتو د پیاوړتیا په موخه ګڼ شمېر پانګونې او حمایوي پروګرامونه پلي کړي دي. د المعیار په څېر د پروسس فابریکو فعالېدل نه یوازې د داخلي تولیداتو ارزښت لوړوي، بلکې د سیمې بزګرانو ته د بازار موندنې اسانتیاوې برابروي او د افغانستان د اقتصادي خپلواکۍ پر لور یو مهم ګام بلل کېږي.
