هلمند کې د کېلې بوټي د تکثیر او پراختیا په پار هڅې کړندي شوي

۱۵ مرغومي ۱۳۹۸
د هلمند دکرنې، اوبولګولو اومالدارۍ ریاست چارواکي وایي، چې ددې ولایت په څېړنیز فارم کې پر یوشمېر نوو نباتاتو څېړنې شوي دي، چې له دې ډلې د کېلي بوټې هم په توافقي ډول تر څېړنې لاندې نیول شوي و تر څو ددې ولایت د خاورې، اوبو او هوا سره یې توافق وارزول شي.
ددې څیړنې له مخې تر دې مهاله د یادو بوټو بدني وده او نمو په ښه حالت کې قرار لري او تر ډېره یې ددې ولایت له خاورې، اوبو او هوا سره ښه توافق ښودلي دي.
دهلمند ولایت د کرنې، اوبولګولو او مالدارۍ ریاست لخوا، د نوموړي بوټي د ترویج او تکثیر په موخه بزګرو ته عامه پوهاوی، عملي او نظري زده کړې هم ورکړل شوي دي .
د هلمند دکرنې ریاست د کېلې د بوټي د ترویج او تکثیر په برخه کې د خپلو هڅو په دوام ددې ولایت په څیړنیز فارم کې نږدې ۱۸۰ اصله د کیلې نوي بوټي کرلي دي، تر څو له مخې یې هلمند کې د کیلې بوټيپراختیا ومومي او ځمکوال وهڅیږي چې په خپلو ځمکو کې د کېلې کرکېلي ته مخه کړي.
د هلمند د کرنې، اوبولګولو او مالدارۍ رییس زلمی الکو وویل، دوی هلې ځلې کوي چې په دې ولایت کې د کوکنارو د کرکېلي د مخنیوي په پار بزګرانو ته نوی ارزښت لرونکي کرنیزې توکي ور وپېژنې.
ښاغلي الکو وويل، په همدې موخه ددې ولایت په څېړنیز فارم کې د کېلي بوټي کرل شوي او پرې څېړنې شوي دي.
باید وویل شي، چې د هلمند دکرنې، اوبولګولو او مالدارۍ ریاست په دې ولایت کې د بزګرانو د ملاتړ او د کوکنارو د کرکېلي د بدیل پیداکولو په پار تل هلې ځلې کوی او په دې برخه کې یې ګڼ شمېر بریالي پروګرامونه هم پلي کړي دي.