د کندهار نوروزي څېړنیز فارم کې د لمرګل حاصلاتو راټولول پیل شو

۹ لیندۍ ۱۴۰۴ هـ.ش
۹ جُمَادَى الثاني ۱۴۴۷ هـ.ق
د کندهار کرنې، اوبو لګولو او مالدارۍ ریاست تر رهبرۍ لاندې، د نوروزي څیړنیز فارم مسؤلینو له لوري د لمرګلي نبات د سږني حاصلاتو راټولولو لړۍ پیل سوې ده، چې په نږدې ورځو کې به یې ټول حاصل راټول سي.
د کوهکران څیړنیز فارم عمومي مسؤل الحاج ملا فتح محمد فیضي وايي، دغه کرنه نږدې څلور میاشتې وړاندې د ازموینې او د بزګرانو د تشویق په موخه پر شاوخوا ۳۰ جریبه ځمکه ترسره سوې وه، ترڅو کروندګر یې له نیږدې وڅېړي او په خپلو ځمکو کې یې وکري.
نوموړی زیاتوي، چې د لمرګلي نبات کرنه په کندهار کې د نورو ولایتونو په پرتله ښه نتیجه ورکوي او حاصلات یې هم زیات دي. د ده په وینا، لمرګل د غوړیو د تولید یوه مهمه سرچینه ده، چې بزګران کولای شي له دې لارې ښه عاید تر لاسه کړي او هم وطني غوړي تولید کړي.
د یادونې وړ ده، چې د لمرګل کرنه په کندهار کې له تېرو څلورو کلونو راهیسې دوام لري، چې هر کال پرې د کوهکران فارم متخصصینو څېړنې کړي او پایلې ښيي چې کندهار د دې نبات د کرنې لپاره تر بل هرځای ډېر مناسب اقلیم لري.