د هلمند مارجې ولسوالی کې د څه باندې څلور کیلومتره کانال د پاکولو چارې پیل شوې

۶ لیندۍ ۱۴۰۴ هـ.ش
۶ جُمَادَى الثاني ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست  په هلو ځلو، د سیمې د اوسیدونکو د اړتیا او غوښتنې په اساس، ددې ریاست اړوند قدرتي سرچینو آمریت له لوري، د مارجې ولسوالی د کاریز سعید کلي د کانال د پاکولو چارې رسمآ پیل شوې. 
د پرانیستې دغه مراسم د مارجې ولسوالی د استازو، د کرنې ریاست د مسوولینو، د کرنې وزارت د استازي، د سیمې د ملکانو او قومي مشرانو په پراخه ګډون ترسره شول، او عملي کار یې په ساحه کې په رسمي توګه پیل شو.
دغه کانال چې ۴.۱۴۸ متره اوږدوالی لري، د اوبو د ښه جریان او د منځګړو کرنیزو ځمکو د ساتنې لپاره خورا حیاتي ارزښت لري.
د یاد کانال پورتنۍ عرض ۱۵ متره او لاندنی بستر یې ۸ متره ده، چې په پاکولو سره به یې د سیمې کرنیزو ځمکو ته د پام وړ ګټه ورسېږي.
ددې پروژې ټولیز لګښت دوه میلیونه او ۹۶۰ زره افغانۍ ده، چې دکرنې وزارت له پراختیایي بودیجې څخه تمویلېږي.
د دې بودیجې له لارې به نه یوازې د کانال بشپړه پاکول تر سره شي، بلکې د سیمې د زرګونو بزګرانو د اوبو ستونزې به هم په واضح ډول راکمې شي او د کرنیزو حاصلاتو د لوړوالي لپاره به زمینه نوره هم برابره شي.
سیمه ییزو مشرانو د پروژې د پیل هرکلی وکړ او دا یې د مارجې د کرنیز پرمختګ لپاره یو مهم ګام وباله.
په ورته وخت کې د هلمند د کرنې ریاست چارواکي وایي، چې د کانال له پاکېدو سره به کروندګر د اوبو له ډنډېدو، خړوبېدو له ګډوډۍ، او د ځمکو د تیزابي کېدو له خطره خلاص شي.
د هلمند د کرنې ریاست مسوولینو ټینګار وکړ چې دا ډول پروژې د سیمې د کرنیز امنیت او اقتصادي ثبات لپاره حیاتي ارزښت لري او د وزارت له تګلارې سره سم، د خلکو اړتیاوې په لومړیتوب کې دي.