د کرنې وزارت د سټراټیژیکو زېرمو رییس د کندهار دکرنې رییس او اړوندو چارواکو سره وکتل
۴ لیندۍ ۱۴۰۴ هـ.ش
۴ جُمَادَى الثانی ۱۴۴۷ هـ.ق
د کرنې، اوبولګولو او مالدارۍ وزارت پلاوی کندهار ولایت ته د خپل سفر په ترڅ کې د ددې ولایت د کرنې ریاست له مسؤلینو سره ناسته ترسره کړه.
یاد پلاوی چې مشري یې د وزارت د سټراټیژیکو زېرمو رییس مولوي قدرت الله حقیار کوله، او ورسره قاري سمیع الحق، محمدپذیر حقپال او عبدالله جان خاکسار مل وو، د کندهار د کرنې رییس مولوی عبدالرشید منیب سره د کندهار ولایت دکرنې په ریاست کې وکتل. په دغه ناسته کې د کندهار دکرنې ریاست یوشمېر نورو چارواکو هم کډون درلود.
د سټراټیژیکو زېرمو رییس مولوي قدرت الله حقیار د سټراټیژیکو غنمو د ساتنې موضوع د ملي اهمیت وړ وبلله او په ټینګار سره یې وویل، چې د زېرمه شوو غنمو د معیاري مراقبت او خوندیتوب لپاره باید جدي او پرلهپسې اقدامات وشي.
د کندهار دکرنې رییس مولوی عبدالرشید منیب پلاوي ته ډاډ ورکړ چې د غنمو د غوره ساتنې لپاره یې یو مسلکي کمیټه ګمارلې ده او ټول اړوند مسؤلین په منظم ډول د یادو غنمو د حفظ او مراقبت چارې تعقیبوي.
هغه زیاته کړه، چې د کرنې ریاست به د خپلو ټولو امکاناتو او توان په کارولو سره د زېرمه شویو غنمو په خوندي ساتنه او مدیریت کې هر اړخیزه همکاري کوي.
پلاوي د ریاست د هڅو ستاینه وکړه او د لا اغېزمن مدیریت لپاره یې خپل لازمې سپارښتنې شریکې کړې.
