هلمند کې یوشمېر حیواني درمل پلورنځۍ او عیر معیاري قصابۍ وتړل شول
۲۴ لړم ۱۴۰۴ هـ.ش
۲۴ جُمَادَى الأول ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست د مالدارۍ او حیواني روغتیا آمریت مسوولینو د ګرشك ولسوالی د حیواني درملو پلورنځیو پراخې څارنې او ارزونې ترسره کړې چې په پایله کې یې ۱۷ درمل پلورنځۍ د قانوني اسنادو او مسلکي کارکوونکو د نشتون او د کرنیزو او حیواني درملو ګډ پلور له امله وتړل شول.
د څارنې پر مهال هغه پلورنځۍ په نښه شول، چې د اړینو مسلکي معیارونو او قانوني جوازونو پرته یې فعالیت درلود. مسوولینو د تړلو له پرېکړې وروسته د یادو پلورنځیو خاوندانو سره قانوني سپارښتنې او لازمې لارښوونې شریکې کړې. د مالدارۍ او حیواني روغتیا آمر حافظ هدایتالله هدایت وویل، چې د دې څارنو موخه د درملو د کیفیت تضمین، د غیر مسلکي کسانو د فعالیت مخنیوی او د مالدارۍ د سکتور خوندیتوب دی. نوموړي زیاته کړه چې دا لړۍ به دوام ولري.
له بلې خوا د هلمند ولایت په مرکز لښکرګاه کې د مالدارۍ او حیواني روغتیا آمریت مسلکي کارکوونکو هغه قصابۍ وتړلې چې څاروي یې د مسلخ له رسمي څارنې او طبي معاینې پرته حلال کړي وو.
مسوولینو ټینګار وکړ چې د څارویو د حلالېدو څخه وړاندې د روغتیاپالانو لخوا بشپړ صحي معاینات ضروري دي، څو د ناروغو حیواناتو غوښې بازار ته ور نه شي. د دوی په وینا، د لښکرګاه ښار په کچه د قصابیو د څارنې لړۍ هره ورځ روانه ده او ټولو قصابانو ته سپارښتنه شوې، چې خپل څاروي د مسلخ له لارې د رسمي څارنې لاندې حلال کړي او د امریت صحي مهر ولري.
د یادو څارنو موخه د عامو خلکو د روغتیا خوندي ساتل، د بېکیفیته غوښو د پلور مخنیوی او د قصابیو د قانوني کړنو پلي کول بلل شوي دي.
