پکتیکا کې د کرنې ریاست او همکارو مؤسسو تر منځ د همغږۍ غونډه ترسره شوه

۲۰ لړم ۱۴۰۴ هـ.ش
۲۰ جُمَادَى الأول ۱۴۴۷ هـ.ق
د پکتیکا ولایت د کرنې، اوبولګولو او مالدارۍ ریاست په تالار کې د همکارو مؤسسو تر منځ د همغږۍ غونډه ترسره شوه.
د غونډې په پیل کې د پکتیکا د کرنې، اوبولګولو او مالدارۍ ریاست رییس مولوي لعل محمد ګوهر د همکارو مؤسسو استازو ته هر اړخیزه وینا وکړه. نوموړي له مؤسسو وغوښتل چې د پکتیکا ولایت له اړمنو خلکو سره خپلې مرستې لا زیاتې کړي او د دوامدارو پرمختیايي پروژو د پلي کولو لپاره منظم پلانونه عملي کړي.
د پکتیکا دکرنې رییس د مؤسسو چارواکو سره د اصولي همکارۍ او دوامداره اړیکو ژمنه وکړه او زیاته یې کړه، چې د کرنې ریاست به د مؤسسو له هڅو او خدمتونو هرکلی کوي.
په غونډه کې د کرنې ریاست د بېلابېلو آمریتونو آمران، د پلان او برنامو مدیر، او د همکارو مؤسسو ولایتي مسؤلین (اکشن‌ایډ، ټیلو، هیلتو او «آر.آر.اې.اې» ګډون درلود. ګډونوالو خپل راپورونه، نظریات او راتلونکي پلانونه له حاضرینو سره شریک کړل.
په پای کې، همکارو مؤسسو د خپلو شته امکاناتو له مخې د همکارۍ ژمنه تازه کړه او څرګنده یې کړه، چې د پکتیکا د اړمنو خلکو د ملاتړ او د کرنیزو خدمتونو د پراختیا لپاره به خپلې هڅې نوره هم زیاتې کړي.