هلمند کې لسګونو مالدارانو ته عامه پوهاوی ترسره شو

۲۰ لړم ۱۴۰۴ هـ.ش
۲۰ جُمَادَى الأول ۱۴۴۷ هـ.ق
دهلمند ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا آمریت په همغږۍ، د وزارت له لوري راغلي تخنیکي پلاوي د مرکز لښکرګاه، نادعلي، ګرشک او ناوې ولسوالیو کې ټولټال ۱۲۰ مالدارانو ته د حیواناتو د تغذیې، درملنې، روزنې او حفظ‌الصحې په اړه عامه پوهاوی او عملي روزنه ورکړه.
یاد روزنیز پروګرام د مالدارانو د ظرفیت لوړولو، د حیواني تولیداتو د زیاتوالي او د ناروغیو د مخنیوي په موخه ترسره شو، چې په ترڅ کې یې ګډونوالو ته د متوازنې تغذیې، واکسین، درملنې او د نظافت اړین اصول په تفصیل سره بیان شول.
په ورته وخت کې مالدارانو دغه پروګرام ګټور وباله او د ورته نورو مسلکي روزنو غوښتنه یې هم وکړه.