دلغمان د کرنې رییس د کرنې وزارت د طبیعي سرچینو ریاست له راغلي پلاوي سره وکتل
۳ لړم ۱۴۰۴ هـ.ش
۳ جُمَادَى الأول ۱۴۴۷ هـ.ق
دلغمان د کرنې، اوبولګولو او مالدارۍ رییس مولوي عبدالستار محمد د خپل کار په دفتر کې د کرنې وزارت د طبیعي ځنګلونو د تنظیم آمر مولوي سمیع الله ساحل په مشرۍ د راغلي پلاوي سره د چارو د همغږۍ په موخه وکتل.
په دغه لیدنه کې د پلاوي مشر مولوي سمیع الله ساحل وویل، د دوی د سفر موخه د طبیعي سرچینو تر چتر لاندې د روانو پروژو څارنه، د شته ستونزو ارزونه او د هغو د حل لارې موندل دي.
نوموړي زیاته کړه، سږکال د لغمان ولایت لپاره د طبیعي سرچینو په اړوند برخه کې د چهارمغزو د نیالګیو کرل، د نیالګیو ساتنه او سرسبزي، د ځنګلونو د اورلګېدنې د مخنیوي وسایلو پېر او همدارنګه د دولتشاه ولسوالی د ګډیالې ساتل شوې سیمې اړوند وګړو ته د عامه پوهاوي پروژې منظورې شوې دي.
د پلاوي مشر څرګنده کړه، چې د یادو پروژو د فعالیتونو څارنه او د بودیجې د مصرف څرنګوالی به له نږدې وڅېړل شي.
همدارنګه د کرنې ریاست د طبیعي ځنګلونو د آمریت کارکوونکو د دغو پروژو د تطبیق په اړه خپل معلومات وړاندې کړل او خپلې ستونزې یې هم شریکې کړې.
دلغمان د کرنې رییس مولوي عبدالستار محمد د پلاوي هرکلی او مننه وکړه، چې د پروژو د ښه تطبیق په موخه یې لغمان ته سفر کړی دی. هغه ډاډ ورکړ چې ټولې چارې به د اصولو او مقرراتو له مخې په شفاف ډول ترسره شي.
هغه د ریاست اړوندو کارکوونکو ته لارښوونه وکړه چې د پراختیایي پروژو منظور شوې بودیجه په وخت، شفاف او پرځای مصرف کړي او خپلې هڅې لاپسې ګړندۍ کړي.
