دکابل خاکجبار ولسوالی کې ۵۱ کورنیو ته د چرګانو روزنې توکي ووېشل شول

۱ تله ۱۴۰۴ هـ.ش
۳۰ رَبِیعُ الْأَوَّل ۱۴۴۷ هـ.ق
د افغانستان لپاره د کلیو بیا ودانولو اداره «آر.آر.اې.اې» د کابل ولایت د کرنې، اوبو لګولو او مالدارۍ ریاست تر چتر لاندې د «په افغانستان کې د اغېزمنو ټولنو د هوساینې او پیاوړتیا» تر نوم لاندې پروژه عملي کوي، چې د ډنمارک د کډوالو شورا «ډي.آر.سي» لخوا تمویل شوې ده.
د دغې پروژې په لړ کې د کابل ولایت د خاکجار ولسوالی په کچه ۵۱ مستحقو کورنیو ته د چرګانو د مرغانچې اړین وسایل وېشل شوي دي. هرې کورنۍ ته یوه دروازه، یوه کړکۍ، درې درې متري تیران، درې دانه خوړونکي لوښي، درې دانه اوبخورې، یوه ناوه، یو هواکش پایپ او ۱۵ کیلو ګرامه چونه ورکول شوې ده.
د پروژې مسوولین وایي، چې یادو ګټه اخیستونکو ته به په راتلونکې میاشت کې درې چرګان، ۲۷ چرګانې، ۱۵۰ کیلو ګرامه دانه، د حفظ‌الصحې کټ او واکسین هم ورکړل شي.
د دې پروژې د تطبیق موخه د کلیوالو کورنیو د اقتصاد پیاوړتیا، د خوراکي توکو د خوندیتوب ښه والی او د چرګ پالنې دودول بلل شوی دی.