دهلمند نادعلي ولسوالی کې د کونځلو د کروندو څخه لیدنه وشوه
۲۲ زمری ۱۴۰۴ هـ.ش
۱۹ صَفَر المُظَفَّر ۱۴۴۷ هـ.ق
دهلمند د کرنې، اوبولګولو او مالدارۍ ریاست اړوند د کرنیزو چوپړتیاو مدیریت کارکوونکو ددې ولایت د نادعلي په ولسوالی کې د کونځلو کروندو څخه لیدنه وکړه. د لیدنې پر مهال د کروندګرو د فصلونو د ودې او حاصل خېزۍ وضعیت وڅېړل شو او د کونځلو د کرنې د لا ښه پرمختګ په موخه اړینې سپارښتنې او مشورې ورکړل شوې.
د کرنیزو مشورو په لړ کې کروندګرو ته د وخت پر مهال اوبو لګولو، د ناروغیو او آفتونو د مخنیوي، د خاورې د حاصل ساتلو او د معیاري تخم کارولو په اړه لارښوونې وشوې. همدارنګه د کونځلو د راټولولو پر مهال د کیفیت ساتنې او د بازارموندنې د اسانتیاوو په اړه هم خبرې وشوې.
د هلمند ولایت د کرنې ریاست کارکوونکو ټینګار وکړ چې د علمي لارښوونو عملي کول کولی شي د کونځلو حاصلات څو چنده زیات کړي او کروندګر له اقتصادي پلوه پیاوړي کړي.
