د ننګرهار وادي کرنیز شرکت له لوري د څاګې په سیمه کې د محافظوي پولو د جوړولو چارې روانې دي

۲۲ زمری ۱۴۰۴ هـ.ش
۱۹ صَفَر المُظَفَّر ۱۴۴۷ هـ.ق
د ننګرهار وادي کرنیز شرکت د سېلابونو او د اوبو د زیاتوالي له ګواښه د کرنیزو ځمکو، استوګنیزو کورونو او کروندود خوندیتوب په موخه، د څاګې په سیمه کې د شاوخوا ۴۵۰ مترو محافظوي پولو د جوړولو چارې پيل کړې دي.
د ننګرهار وادي کرنیز شرکت د چارواکو د معلوماتو له مخې، په دې لړ کې یوه پوله چې ۱۰۰ متره اوږدوالی او ۱۳ متره پلنوالی لري، نږدې بشپړېدلو ته رسېدلې ده، او بله پوله چې ۳۵۰ متره اوږدوالی او ۴ متره لوړوالی لري، په نږدې ورځو کې به یې عملي کارونه پیل شي.
یادې چارې د ننګرهار وادي کرنیز شرکت په امکاناتو، عصري ماشینرۍ او مسلکي فني ټیم پرمخ وړل کېږي، چې له بشپړېدو سره به یې د کرنیزو فارمونو، دولتي ملکیتونو او د سیمې د اوسېدونکو شتمنۍ له طبیعي پېښو او سېلابونو خوندي شي.
د سیمې اوسېدونکي وایي، دا د نږدې دوو لسیزو وروسته لومړی ځل دی، چې په دې کچه محافظوي رغونې چارې ترسره کېږي، چې د خلکو د امنیت او باور فضا پیاوړې کړې ده.
د ننګرهار وادي کرنیز شرکت ژمنه کړې، چې د خپلو ټولو فارمونو او شاوخوا سیمو د خوندیتوب لپاره خپلې هڅې نور هم ګړندۍ کړي.