دهلمند ولایت د کرنې رییس د خصوصي سکتور د پانګونې د ودې په موخه د خرما له بڼونو لیدنه وکړه

۲۱ زمری ۱۴۰۴ هـ.ش
۱۸ صَفَر المُظَفَّر ۱۴۴۷ هـ.ق
د هلمند ولایت د کرنې، اوبولګولو او مالدارۍ رییس مولوي نیازمحمد وهاج د خصوصي سکتور د پانګونې او کرنیزو فعالیتونو د هڅونې او ملاتړ په موخه، د دغه ولایت په مرکز لښکرګاه بولان سیمه کې د هغو بزګرانو او پانګوالو د خرما له بڼونو لیدنه وکړه، چې په خپلو شخصي ځمکو کې یې د خرما بڼونه جوړ کړي دي.
په دې لیدنه کې، د هلمند د کرنې رییس د خرما د بڼونو عمومي وضعیت، د ونو د ودې کیفیت او د حاصلاتو کچه له نږدې وکتله او د پانګوالو او بڼوالو ستونزې او غوښتنې یې واورېدې.
ښاغلي وهاج د خصوصي سکتور دغه هڅې د هلمند د کرنې د ودې لپاره مهمې او ګټورې وبللې او ټینګار یې وکړ چې د کرنې ریاست به ورسره د کرنیزو فعالیتونو د پیاوړتیا لپاره له هېڅ ډول همکارۍ او ملاتړ څخه ډډه نه کوي.
نوموړي وویل:«د هلمند ځمکې د خرما د بڼونو د جوړولو لپاره ځانګړې وړتیا لري، ځکه چې د دې ولایت حاصلخېزه ځمکه، کافي اوبه او د اقلیم مناسبه هوا د دې حاصلاتو د تولید لپاره غوره شرایط برابروي».
د هلمند دکرنې رییس دغه راز زیاته کړه، چې د خرما د بڼونو پراختیا نه یوازې د کرنیزو محصولاتو تنوع زیاتوي، بلکې د بزګرانو لپاره د عاید نوې سرچینې هم برابروي او د کارموندنې په برخه کې مثبت اغېز لري.»
باید وویل شي، چې هلمند اوس مهال د کرنیزو حاصلاتو له پلوه د هېواد له مهمو ولایتونو څخه شمېرل کېږي او د خرما د بڼونو د پراخېدو سره به د دې ولایت اقتصادي ارزښت نور هم لوړ شي.