خوست کې د ځنګلونو ساتنې او جلغوزیو محصول په تړاو قومي مشرانو سره ناسته ترسره شوه
۱۹ زمری ۱۴۰۴ هـ.ش
۱۶ صَفَر المُظَفَّر ۱۴۴۷ هـ.ق
د خوست ولایت د نادر شاه کوټ ولسوالی د ځنګلونو مدیریت د ځینخیلو کلي له قومي مشرانو سره د ځنګلونو ساتنې، د جلغوزیو محصول راټولولو او د پېر- پلور په بهیر کې د افغانۍ د کارونې په تړاو ناسته ترسره کړه.
یاده ناسته، د ځنګلونو د قطع کولو د مخنیوي، د نویو ونو کېنولو، د طبیعي شتمنیو خوندي کولو او د چاپېریال د ساتنې په ارزښت تمرکز درلود.
مسوولینو وویل، چې ځنګلونه د هوا د تصفیې، د ځمکې د تودوخې د اعتدال، د ژوو او مرغانو د هستوګنې او د راتلونکو نسلونو د هوساینې لپاره حیاتي اهمیت لري. د دوی په وینا، د غیرقانوني قطع کولو مخنیوی، د جلغوزیو ۱۰٪ محصول اخیستل او د پیر او پلور پروسه په افغانیو ترسره کول، ملي اقتصاد پیاوړی کوي او بزګرانو ته عادلانه ګټه رسوي.
په پای کې ګډونوالو له ټولو وګړو وغوښتل، چې د زرغون افغانستان لپاره په ګډه کار وکړي او د طبیعي شتمنیو د ساتنې په برخه کې خپله ونډه ترسره کړي.
