د میدان وردګ ولایت بهسودو لومړۍ حصه ولسوالۍ کې د اوبو د زېرمې جوړولو چارې پیل شوې
۱۵ زمری ۱۴۰۴ هـ.ش
۱۲ صَفَر المُظَفَّر ۱۴۴۷ هـ.ق
د میدان وردګ ولایت بهسودو ولسوالي لومړۍ حصه ولسوالی سفیدکلا کلي کې د اوبو د زېرمې جوړولو عملي چارې پیل شوې.
یاده پروژه، چې د ډاکار مؤسسې له خوا طرحه شوې، دمیدان وردګو ولایت دکرنې ریاست د کرنیزو خدماتو عمومي مدیریت مسؤلینو په حضور کې پرانیستل شوه. دا پروژه د اوبو د مؤثر مدیریت او کرنیزو ځمکو د خړوبولو په موخه پلي کېږي.
د اړوندو مسؤلینو په وینا، د اوبو د زېرمې جوړولو چارې به په چټکۍ سره پر مخ ولاړې شي او له بشپړېدو سره به یې د سیمې ګڼ شمېر بزګران د اوبو له اسانتیاوو برخمن شي.
د میدان وردګو ولایت دکرنې ریاست چارواکي دا پروژه د کرنیزو محصولاتو د زیاتوالي او د وچکالۍ له خطره د سیمې د خوندیتوب لپاره یو مهم ګام بولي.
