د خوست ولایت نادرشاه کوټ ولسوالی کې د امونو نمونوي کرکېله مثبته پایله ورکړې

۱۵ زمری ۱۴۰۴ هـ.ش
۱۲ صَفَر المُظَفَّر ۱۴۴۷ هـ.ق
د خوست ولایت نادرشاه کوټ ولسوالۍ اړوند د نوي کوټ کلي بزګرانو له‌خوا په نمونوي ډول کرل شوي امونه مثبته پایله ورکړې ده.
د یادې سیمې کروندګر وايي، چې د امو دا کرکېله د دوی د زیاتو هڅو، دوامدارې پاملرنې، عضوي سرې کارولو او منظمې اوبه‌لګونې له برکته بریالۍ شوې ده. د دوی په وینا، د آمو خوند، اندازه او کیفیت بې‌ساری او د بازار غوښتنې سره سم دي.
د کرنې برخې کارپوهان دغه پرمختګ د یادې ولسوالی لپاره یو ښه زېری بولي او وایي، چې که ورته پاملرنه دوام وکړي، نادرشاه کوټ به د آمو له مهمو تولیدوونکو سیمو څخه وشمېرل شي.
د کروندګرو دا بریا د خوست ولایت د کرنیز سکتور د ودې لپاره یو مثبت ګام ګڼل کېږي، چې نه یوازې د بزګرانو اقتصاد به پیاوړی کړي، بلکې د امو د صادراتو لپاره هم زمینه برابرولی شي.