دهلمند مارجې ولسوالی بزګرانو ته د نباتي ناروغیو مخنیوی په اړه عامه پوهاوی ورکړل شو

۱۳ زمری ۱۴۰۴ هـ.ش
۱۰ صَفَر المُظَفَّر ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست د کرنیزو چارو امریت اړوند د بوټو ساتنې او قرنطین عمومي مدیریت مسلکي کارکوونکو د مارجې ولسوالی ګڼو بزګرانو ته د پنبې او ممپلیو پر فصلونو د نباتي آفتونو (نباتي کنو، شپږیو، د پختې د غوزې چینجی، تیزو کنو) د پېژندنې، مخنیوي او کنټرول په اړه عامه پوهاوی ورکړ.
په دې پروګرام کې بزګرو ته د آفتونو پر ضد د میخانیکي او کیمیاوي کنټرول لارو وضاحت ورکړل شو. همداراز، هغوی ته هغه کیمیاوي درمل معرفي شول، چې پر چاپېریال منفي اغېز نلري او د آفتونو په مؤثر ډول له منځه وړلو کې مرسته کوي.
همدارنګه، بزګرو ته د منظمې او پر وخت اوبولو، د کیمیاوي سرو پر خپل وخت کارولو، او د فصلونو د تغذیې پر پیاوړتیا تاکید وشو، ترڅو کښتونه د آفتونو او ناروغیو پر وړاندې مقاومت پیداکړي.
د مسؤلینو په وینا، که چیرې بزګران یادې سپارښتنې عملي کړي، نو کولی شي لوړ، باکیفیته او اقتصادي حاصلات تر لاسه کړي.