کندهار کې له پاکستان څخه د ۴۵۰۰ بې‌کیفیته وارداتي چرګانو مخه ونیول وشه
۸ زمری ۱۴۰۴ هـ.ش
۵ صَفَر المُظَفَّر ۱۴۴۷ هـ.ق
د کرنې، اوبو لګولو او مالدارۍ وزارت تر رهبرۍ لاندې، د کندهار ولایت سپین بولدک ولسوالۍ قرنطین مسؤلینو د ګاونډي پاکستان څخه واردېدونکي ۴ زره ۵۰۰ بې‌کیفیته او د معیار خلاف چرګان نیولي او د هېواد نورو سیمو ته د انتقال اجازه یې نه ده ورکړې.
د قرنطین مسؤلین وایي، نیول شوي چرګان د زیات عمر لرونکي او د وزن له پلوه تر ۲ کیلوګرامه زیات ول، چې د وزارت د ځانګړي مکتوب له مخې واردول یې ممنوع دي. د وزارت د مالدارۍ برخې د مالوماتو پر بنسټ، دا ډول چرګان ښایي د ودې ورکوونکو هورمونونو له امله لوی شوي وي، چې د غوښې کیفیت ته زیان رسوي او د انسان روغتیا ته جدي خطرونه پېښوي.
د کرنې وزارت مسؤلین ټینګار کوي، چې یوازې هغه چرګان واردېدای شي چې ټاکل شوي معیارونه پوره کړي، څو د خلکو روغتیا خوندي پاتې شي.
