کندهار کې د شاوخوا ۲۰۰ زره ډالرو په ارزښت، د ۱۵ سړو خونو رغنیزې چارې پیل شوې

۵ زمری ۱۴۰۴ هـ.ش
۲ صَفَر المُظَفَّر ۱۴۴۷ هـ.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د خوړو او کرنې ادارې «اف،اې،او» په مالي او د بشري خیریه مؤسسې (او.ایچ.ډبلیو) په تخنیکي همکارۍ، د خاکریز او ژړۍ ولسوالیو د کوچني او منځني کچې بزګرانو د ملاتړ په موخه د شاوخوا ۲۰۰ زره امریکایي ډالرو په ارزښت د ۱۵ صفر انرژۍ سړې خونې جوړولو چاري پیل شوې. 
یادې سړې خونې د برېښنا نه شتون، محلي اسانتیاوو او د سیمې اقلیمي شرایطو ته په پام سره جوړېږي. چې له دغو سړو خونو څخه ۱۰ په خاکریز او ۵ به په ژړۍ ولسوالۍ کې جوړې شي، چې هره سړه خونه به د ۲۰ متریک ټنه پیازو د ساتلو ظرفیت ولري. د دغو سړو خونو ګټه اخیستونکي هغه تولیدونکي او ګروپونه دي، چې وړاندې د بزګرانو د ملاتړ لپاره جوړ شوي دي. د کندهار دکرنې ریاست د چارواکو په خبره راتلونکي کې به دوی ته د پیازو زېرمهکولو، مدیریت، او تخنیکي چارو اړوند عملي او نظري روزنه هم ورکړل شي.
د دغو سړو خونو د جوړولو موخه د پیازو حاصل د اوږدې مودې لپاره په ښه کیفیت وساتل، د بزګرانو تولید ته بازارموندنه، د بیو کنټرول او کیفیت لوړول دي. دا خونې به د بزګرانو د پیازو د محصولاتو د ضایعاتو مخنیوی وکړي، او بزګر ته به د مهمو وختونو لپاره لازمې اسانتیاوې برابرې کړي.
د یادونې وړ ده، چې د کندهار د کرنې ریاست په دې وروستیو کې خپلو بزګرانو ته د لازمو اسانتیاوو برابرولو لپاره ځانګړې پاملرنه کړې، او هڅه کوي چې د هرې ولسوالی بزګرانو ته د حاصلاتو د ښه مدیریت، خوندیتوب او بازارموندنې لپاره لازم خدمات برابر کړي.