د پکتیا مرکز او احمدابا ولسوالی کې یوشمېر بڼوالو سره د بڼوالۍ توکو مرسته وشوه

۲ زمری ۱۴۰۴ ه‍.ش
۲۸ مُحَرَّمُ الحَرام ۱۴۴۷ه‍.ق
د پکتیا د کرنې، اوبولګولو او مالدارۍ ریاست په هڅو، د افغانستان لپاره د ناروی کمیټې «ان اې سي»  په مالي ملاتړ، او د همدې مؤسسې په تخنیکي همکارۍ، د مرکز ګردیز او احمدابا ولسوالی  پر ۱۰ تنو بڼوالو د بڼوالۍ اړوند مهم توکي ووېشل شول.
یاده مرسته  د مرکز او احمدابا ولسوالی د کرنې او مالدارۍ مسؤلینو تر څارنې لاندې ترسره شوه، په دغه مرسته کې پنځه قلمه د  بڼوالۍ توکي ورکړل شول، چې په کې ۲۰ لیتره دواپاشي پمپ، د ښاخبرۍ قیچي، د دواپاشي جامې، ماسک او عینکې شامل دي.
د دې مرستې موخه د بڼوالو اقتصادي پیاوړتیا، د بڼوالۍ کیفیت لوړول، د مېوو د راټولولو او ښاخبرۍ لپاره معیاري وسایلو ته لاسرسی برابرول، او د حاصلاتو ښه مدیریت ښودل شوی دی.
 د پکتیا دکرنې ریاست چارواکي وایي، چې له دغو توکو سره بڼوال کولی شي خپل بڼونه په معیاري توګه اداره کړي، ښې حاصلات ترلاسه کړي، او بازار لپاره مناسب محصولات تولید کړي.
د یادونې وړ ده، چې په دې وروستيو کې د پکتیا د کرنې ریاست د کرنې سکتور د ودې، پراختیا او معیاري کیدلو لپاره هڅې زیاتي کړي دې.