د غزني په ولایت کې له حیواني او نباتي درمل پرونځیو څخه څارنه وشوه

۱ زمری ۱۴۰۴ ه‍.ش
۲۷ مُحَرَّمُ الحَرام ۱۴۴۷ه‍.ق
د غزنی ولایت د کرنې، اوبو لګولو او مالدارۍ ریاست اړوند د کرنیزو خدمتونو تخنیکي ټیم له خوا، په دې ولایت کې د حیواني او نباتي درملو د کیمیاوي سرو پلورنځیو څارنه ترسره شوه.
د دې څارنې موخه داده، چې پلورل کېدونکي درمل د کیفیت له پلوه وارزول شي، د پلور قانوني شرایط وسنجول شي او معلومه شي چې آیا یادې پلورنځۍ د کرنې او مالدارۍ وزارت له خوا ټاکل شوو معیارونو سره سم فعالیت کوي که نه.
د څارنې پر مهال موظفو کارکوونکو د پلورنځیو درمل، د هغوی د زېرمه کولو طریقه، د درملو ختمېدونکي نیټې، او د پلورونکو مسلکي پوهه وکتله. مسؤلینو له هغو پلورونکو سره تخنیکي مشورې هم شریکې کړې، چې درمل یې د حفظ الصحې له اصولو سره سم نه وو ساتلي، یا یې د غیر مسلکي اشخاصو له خوا کارول کېدل.
ددغې څارنې موخه داده، چې بزګرانو او مالدارانو ته معیاري، خوندي او مؤثر درمل او کیمیاوي سره برابر شي او د درملو د پلور بهیر تر قانوني چتر لاندې وساتل شي، ترڅو د کرنې او مالدارۍ سکتور ته تاوان ونه رسېږي.
د څارنې ټیم سپارښتنه وکړه، چې ټول پلورونکي باید د درملو پلور لپاره قانوني جواز ولري، درمل د ختمېدو له نېټې مخکې وپلوري، او د حفظ الصحې مناسب شرایط مراعات کړي.
 باید وویل شي، چې دا ډول څارنې به په دوامداره ډول دوام ومومي، څو د نباتي او حیواني روغتیا لپاره شفاف او خوندي خدمتونه وړاندې شي.