لغمان کې د مرابحې بیعې له مخې پور اخیستونکو لپاره روزنیز پروګرام ترسره شو

۲۵ چنګاښ ۱۴۰۴ ه‍.ش
۲۰ مُحَرَّمُ الحَرام ۱۴۴۷ه‍.ق
د لغمان ولایت په مرکز کې د کرنیزې پراختیا صندوق د ختیځ زون د مسؤولینو له لوري، د لغمان د کرنې ریاست په همغږۍ، هغه کاروباریانو او بزګرانو ته روزنیز پروګرام ترسره شو، چې مخکې یې دپور  اخیستلو لپاره عرضونه کړي وو.
یاد روزنیز پروګرام د کرنیزې پراختیا صندوق د حاصل وړ تحویلاتو مسؤل احمد سیار حقیار له خوا د مرابحې بیعې د اسلامي کړنلارې له مخې د پرزینټېشن له لارې تشریح شو.
په غونډه کې د لغمان د کرنې رییس مولوي عبدالستار محمد، د کرنیزو چارو آمر بریالی همدرد، بزګران، د لبنیاتو سکتور استازي او د خصوصي سکتور نور مسؤلین ګډون درلود.
د لغمان دکرنې رییس مولوي عبدالستار محمد برخوالو ته څرګنده کړه، چې دغه برنامه د کرنې وزارت په چوکاټ کې د اسلامي اصولو پر بنسټ د مرابحې بیعې له لارې تطبیقېږي. د دې پروګرام له مخې، هغه بزګران، فارم لرونکي او کاروباریان چې کاروبارونه یې له خنډ سره مخ شوي، کولی شي له ۲۰۰ زره افغانیو څخه تر ۱.۵ میلیونه افغانیو پورې پور ترلاسه کړي.
په پور اخیستل شوې پیسې به برخوالو ته د ټاکل شوې کړنلارې مطابق، په قسطونو کې بېرته د کرنیزې پراختیا صندوق ته تحویلیږي، تر څو له دغې لارې د دوي کاروبارونه بېرته احیا او تقویه شي.