هلمند کې د مالوچو کروندګرو ته د نباتي آفتونو مخنیوی په اړه لارښوونې وشوې

۲۴ چنګاښ ۱۴۰۴ ه‍.ش
۱۹ مُحَرَّمُ الحَرام ۱۴۴۷ه‍.ق
د هلمند ولایت د کرنې، اوبولګولو او مالدارۍ ریاست د کرنیزو چارو آمریت اړوند د بوټو ساتنې او قرنطین لوی مدیریت مسلکي کارکوونکو له خوا، د دې ولایت د عینک د دښت سیمې مالوچو کروندګرو ته د نباتي آفتونو پر وړاندې د مبارزې په موخه میخانیکي او کیمیاوي لارښوونې ترسره شوې.
په یاده سیمه کې د مالوچو په کروندو کې د غوزي چنجی، مچ، نباتي شپږیو او کنو په اړه،  کروندګرو ته لازمې لارښوونې وشوې. بزګزو ته سپارښتنه وشوه، چې هغه د پنبې تخمونه وکري، چې لنډ قد لري، غوټې ډېرې نیسي، د آفتونو پر وړاندې مقاومت لري او ژر حاصل ورکوي.
همداراز، د کیمیاوي درملو د کارونې په اړه هم کروندګرو ته سپارښتنې وشوې، ترڅو یوازې هغه درمل استعمال کړي چې نباتي آفتونه له منځه وړي خو چاپېریال ته لږ زیان رسوي.
مسلکي کارکوونکو واضح کړه، چې که دا آفتونه پر وخت کنټرول نه شي، د پنبې غوټۍ کوچنۍ او کلکې پاتې کېږي، د تار ورکولو کیفیت له منځه وړي او د بازار تقاضاء نه لري.