د بلخ شولګرې ولسوالی کې بېوزلو کورنیو ته وزې او د څارویو خوراکه ووېشل شوه
۲۲ چنګاښ ۱۴۰۴ ه.ش
۱۷ مُحَرَّمُ الحَرام ۱۴۴۷ه.ق
د بلخ د کرنې، اوبو لګولو او مالدارۍ ریاست په هڅو، د «آی،آر،سي» مؤسسې په مالي ملاتړ د بلخ د شولګرې ولسوالی پر ۱۵۹ اړمنو کورنیو وزې، وزګوړي او د څارویو خوراکي توکي ووېشل شول.
د دې مرستې له مخې، هرې کورنۍ ته دوه محلي وزې، دوه وزګړي او دوه بوجۍ حیواني متراکمه خوراکه ورکړل شول.
د یادې پروژې موخه د بېوزلو کورنیو اقتصادي وضعیت پیاوړي کول، د مالدارۍ د ودې له لارې د هغوی د عاید سرچینې زیاتول، او د خوړو خوندیتوب ته وده ورکول دي.
د افغانستان په یوشمېر سیمو کې، بېوزلې کورنۍ له جدي اقتصادي ستونزو سره مخ دي، چې د مالدارۍ وړې پروژې کولای شي د هغوی د ژوند کیفیت ښه کړي.
