د میدان وردګو دایمیرداد کې د اوبو مدیریت، سپما او کرنې پیاوړتیا په پار ۱۶ نوي پروژې پلي کېږي
د میدان وردګو ولایت د دایمیرداد ولسوالی په بېلابېلو کلیو کې «د کلیوالي ودې او پراختیا پروګرام» تر چتر لاندې، د ډاکار مؤسسې لهخوا د ۱۶ کرنیزو پروژو تخنیکي سروې ترسره شوه.
یاده سروې د روان کال د چنګاښ میاشتې په ۱۱مه د ډاکار مؤسسې د تخنیکي ټیم او د کرنیزو خدمتونو مدیریت په همکارۍ ترسره شوه. سروې د ایمي امنیت، د خلکو همکارۍ او تخنیکي اصولو ته په پام، پرته له کوم خنډ څخه په بریالیتوب سره بشپړه شوه.
د میدان وردګو ولایت دکرنې، اوبولګولو او مالدارۍ ریاست چارواکي وایي، چې په دغو پروژو کې؛ د کانالونو جوړول، د اوبو زېرمه کولو لپاره د حوضونو جوړول، د ۱۰۵ سپما ګروپونو جوړول او د ۲۰۰ بابه ورخونو جوړول شامل دي. د یادو پروژو موخه، د کرنیزو خدماتو پراختیا، د اوبو مدیریت ښهوالی، د کرنیزو محصولاتو زیاتوالی او د کلیوالو اقتصادي پیاوړتیا ده. د دایمیرداد ولسوالی خلکو د دغو پروژو له پیلېدو څخه ژوره خوښي وښوده، د میدان وردګو ولایت د کرنې له ریاست او ډاکار مؤسسې څخه یې مننه وکړه، او هیلهیې څرګنده کړه چې په راتلونکې کې ورته پراختیایي پروژې دوام ومومي.
د ډاکار مؤسسې مسؤلینو ډاډ ورکړ، چې د سروې پایلو له تثبیت وروسته، به د پروژو فزیکي کارونه ان شاءالله ډېر ژر پیل شي. یاده هڅه د میدان وردګو ولایت په لرې پرتو سیمو کې د کلیوالو ژوندانه د ښهوالي، اقتصادي ودې او کرنیزې ثبات لپاره یو ارزښتناک ګام بلل کېږي.
