غزني کې د ۱۳ کانالونو د بیارغونې او ۱۰ کانالونو د پاککارۍ پروژې پیل شوې
د غزني ولایت د کرنې، اوبولګولو او مالدارۍ ریاست د «پي،آی،ان» مؤسسې په تخنیکي همکاری او د ایټالیا هېواد په مالي ملاتړ، «د کرنیزو خطرونو مدیریت او په افغانستان کې د دوامدارې اوبه لګونې اسانتیاوو» تر عنوان لاندې پروژه په مالستان او اجرستان ولسوالیو کې پیل کړه.
یاده پروژه، چې د ۲۰۲۵م کال تر پایه تطبیقیږي، موخهیې د وچکالۍ، سېلابونو او اوبو کمښت په وړاندې د کلیوالي ټولنو ملاتړ، د کرنیزو اوبو د مدیریت ښهوالی او د کرنیزو ځمکو حاصلخېزي ده.
د مالستان ولسوالی د یوه کانال د پرانیستې په مناسبت، یوه غونډه جوړه شوې وه، چې پکې د ولسوالی سیمهییزو چارواکو، د کرنې ریاست تخنیکي ټیم، د «پي،آی،ان» مؤسسې مسؤلینو او د سیمې مشرانو ګډون کړی و. په غونډه کې د کرنې ریاست سلاکار وحیدالله باختري د پروژې جزئیات او د کانالونو ارزښت تشریح کړل. ښاغلی باختري وویل، چې په دغو پروژو کې د ۱۳ کانالونو بیارغونه او د لسو کانالونو پاککارۍ، چې د ۱۳ کانالونو له ډلې ۷ کانالونه به په اجرستان او ۶ کانالونه به په مالستان ولسوالی کې بیارغول کېږي شامل دي، دغه راز د پاککارۍ چارې به د یوې میاشتې لپاره ۱۰۰ مستحقو کسانو ته د کار زمینه برابره کړي او هر کارکوونکی به د ۲۲ ورځو کار په بدل کې ۷۲ یورو معادل افغانۍ ترلاسه کوي. ددغو پروژو ټولیز لګښت ۱۷۶ زره امریکایي ډالرو ته رسېږي، چې د تطبیق موده یې شپږ میاشتې ټاکل شوې ده.
ددغو پروژو په پلي کېدو سره له ۵۰۰ زیاتو کورنیو به د طبیعي افتونو، لکه وچکالۍ، اوبو کمښت او سېلابونو پر وړاندې ملاتړ وشي. شاوخوا ۲۰۰۰ تر ۳۰۰۰ جریبه کرنیزه ځمکه به خړوبه شي، د شاوخوا ۴۰٪ اوبو د ضایع کېدو مخنیوی به وشي او د طبیعي افتونو د خطرونو کچه به راټیټه شي.
یاده پروژه د غزني ولایت د لرې پرتو سیمو لپاره د کرنیز حالت ښهوالی، د سیمهییز اقتصاد پیاوړتیا، د خوړو خونديتوب او د طبیعي افتونو د مخنیوي په برخه کې یو مهم پرمختګ ګڼل کېږي.
