کندهار کې د کروندو خوندیتوب په پارهڅې؛ ۳۵۰ ډوله بوټي درمل شوي

۱۲ چنګاښ ۱۴۰۴ ه‍.ش
۷ مُحَرَّمُ الحَرام ۱۴۴۷ه‍.ق
د کندهار د کرنې، اوبو لګولو او مالدارۍ ریاست د بوټې ژغورنې مدیریت تر رهبرۍ لاندې، په تېرو درېیو میاشتو کې شاوخوا ۳۵۰ بېلابېل ډوله بوټي د ناروغیو او آفتونو له امله تشخیص او د درملنې اړینې لارښوونې او نسخې بزګرانو ته ورکړل شوي دي.
د یاد مدیریت مسؤلین وایي«:د نباتاتو ناروغۍ له امله د کندهار له بېلابېلو ولسوالیو څخه ګڼ شمېر بزګرانو د خپل کښت د ژغورنې او مؤثره درملنې په موخه مراجعه کړې، چې د دوی د مسلکي کسانو له خوا تشخیص او درملنه شوي. تشخیص شوي نباتات انځر، انګور، انار، خټکې، هندوانه، پیاز، هوږه، غنم، بېلابېل سابه او زینتي بوټي شامل دي، چې د نباتاتو د نوعیت او ناروغۍ مطابق ورته مشخص درمل او مشورې ورکړل شوي دي.»
د کندهار دکرنې ریاست د بوټې ژغورنې مسوولین پر بزګرانو غږ وکړ، چې پر خپلو کښتونو دې خودسرانه کرنیز درمل نه پاشي، بلکې د کرنیزو ستونزو د دقیق تشخیص او مؤثره درملنې لپاره دې دکندهار د کرنې ریاست بوټې ژغورني مدیریت ته مراجعه وکړي. دا به مرسته وکړي، چې د بوټو ناروغۍ په سمه توګه کنټرول او د حاصل د له‌منځه تلو مخنیوی وشي.
د کندهارد  کرنې ریاست مسؤلین ژمن دي، چې د بزګرانو نباتات به د ناروغیو پر وړاندې تشخیص او درمل کړي، ترڅو د کرنیزو محصولاتو کمښت او اقتصادي زیانونه راکم شي. یاد ریاست هڅه کوي، چې بزګرانو ته وخت پر وخت مسلکي مشورې او درملنې نسخې ورکړي، ترڅو د کرنیزو چارو کیفیت لوړ او پایلې یې اغېزمنې وي.