کندهار کې لسګونو بزګرانو ته د انګورو د حاصل راټولولو او د اوبو د مؤثرې کارونې په موخه روزنه ورکړل شوه
۴ چنګاښ ۱۴۰۴ ه.ش
۲۸ ذُو الحِجَّةِ ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د سولې بنسټ (آر. او. پي) مؤسسې په همکارۍ د کندهار په نېش او میوند ولسوالیو کې ۹۵ بزګرانو ته د انګورو د حاصل راټولولو، پروسس کولو او د اوبو د مؤثرې کارونې په موخه روزنه ورکړل شوه.
په دې روزنه کې ۳۰ تنه د نېش او ۳۰ تنه د میوند ولسوالۍ بزګران د انګورو د حاصل راټولولو او پروسس کولو په برخه کې وروزل شوه. همداراز ۱۲ تنه د نېش او ۱۳ تنه د میوند ولسوالۍ بزګران د اوبو د مؤثرې کارونې په برخه کې روزنه ترلاسه کړه. دا روزنه به بزګرانو سره مرسته وکړي، چې د انګورو حاصل په اغېزمنه توګه راټول او پروسس کړي او ترڅنګ به د اوبو مناسب استعمال لپاره عملي لارې چارې وکاروي.
د دې روزنې موخه د بزګرانو مسلکي وړتیا لوړول، هغوی ته د انګورو د حاصل راټولولو او پروسس کولو مؤثرې طریقې ښودل، د اوبو د کارونې منظم سیستم رامنځته کول او د اوبو په مؤثر استعمال کې د بزګرانو عامه پوهاوی زیاتول دي.
د یادونې وړ ده، چې د کندهار د کرنې ریاست د خپلو همکارو مؤسسو په همغږۍ توانیدلی، چې په وروستیو کې ګڼو بزګرانو ته په بېلابېلو برخو کې روزنه ورکړي. د همدې لړۍ په دوام، دوه اوونۍ وړاندې هم د اسلامي هوساینې مؤسسې په مالي ملاتړ ۷۰۰ بزګرانو ته د غنمو د حاصل راټولولو په برخه کې روزنه ورکړل شوې وه.
