میدان وردګو کې د معیاري سړې خونې رغنیزې چارې وارزول شوې
۲۸ غبرګولی ۱۴۰۴ ه.ش
۲۱ ذُو الحِجَّةِ ۱۴۴۶ه.ق
د کرنې، اوبولګولو او مالدارۍ وزارت د کرنیزو محصولاتو د خوندیتوب او بازار موندنې په برخه کې د خپلو هڅو په دوام، د میدان وردګ ولایت په مرکز میدانښار کې د ۵۵ میلیونه افغانیو په ارزښت د ۲۰۰۰ ټنه ظرفیت لرونکې سړې خونې او د مېوو د جالیو فابریکې رغنیزې چارې پیل کړي دي، ددې پروژې د دوامدارې ارزونې په پار د ولایت مقام، کرنې او اقتصاد ریاستونو څخه درې ګونې پلاوي ټاکل شوي، ترڅو ددې پروژې له رغنیزو چارو څخه څارنه وکړي.
د میدان وردګو ولایت دکرنې ریاست چارواکي وویل، چې دا یوه حیاتي پروژه ده، چې د ولایت د بزګرانو د مېوو د خوندیتوب او اقتصادي ودې لپاره ځانګړی اهمیت لري. موږ د دې پروژې د معیاري تطبیق په پار هلې ځلې کوو.
تمه ده چې، دا پروژه د سیمې زرګونه بزګرانو ته د مېوو د ساتنې، بسته بندۍ، او بازارموندنې په برخه کې سترې اسانتیاوې برابرې کړي، د صادراتو بهیر پیاوړی کړي او د کرنیزو تولیداتو ارزښت لوړ کړي.
