بلخ ولسوالی کې د طاعون ناروغۍ د مخنیوي په موخه یوشمېر څاروي واکسین شوه
۲۸ غبرګولی ۱۴۰۴ ه.ش
۲۱ ذُو الحِجَّةِ ۱۴۴۶ه.ق
د بلخ د کرنې، اوبو لګولو او مالدارۍ ریاست له خوا، د بلخ د مسلکي پارا وټرانو په تخنیکي همکارۍ او د مالدارۍ آمریت تر مستقیمې څارنې لاندې، د یادې ولسوالی یوشمېر کوچني څاروي د طاعون ناروغۍ د مخنیوي په موخه واکسین شوه.
یاد واکسین د بلخ ولسوالی په ټولو سیمو کې تطبیق شو، چې موخه یې د طاعون وژونکې ناروغۍ مخنیوی، د څارویو روغتیا خوندي ساتل، د مالدارانو د اقتصادي زیانونو کمول او مسلکي کسانو ته د کار فرصتونو برابرول دي. د واکسین د دې کمپاین سره به د څارویو شیدو او غوښې تولید عادي پاتې شي، د ناروغیو خپرېدل به په وخت کنټرول شي.
د یادونې وړ ده، چې وړاندې هم د بلخ کرنې ریاست په هڅه، د خوړو او کرنې ادارې په مالي ملاتړ، په یوشمېر ولسوالیو کې دې ته ورته واکسین تطبیق شوی و، چې په ترڅ کې یې زرګونه کوچني څاروي واکسین شوې وه.
