کندهار کې د پنبې تخنیکي روزنې پروګرام پیل شو
۲۷ غبرګولی ۱۴۰۴ ه.ش
۲۰ ذُو الحِجَّةِ ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د نشهيي توکو او جرمونو پر وړاندې د مبارزې ادارې یو ان او ډي سي او د صنعتي پراختیا سازمان یو ان آی ډي او په مالي ملاتړ او همغږۍ، د پنبې پروسس او بسته بندۍ د ښهوالي په موخه د پنبې ۲۰ تنو سوداګرو ته تخنیکي روزنیز پروګرام پیل شو.
په دې پروګرام کې د کندهار او هلمند ولایتونو لس لس تنو د پنبې سوداګرو ګډون کړی. یاد ګډونوال به د پاکستان څخه راغلو دوه تنو متخصصینو لهخوا، د پنځو ورځو په موده کې، د پنبې پروسس، د ماشینرۍ مؤثر استعمال، ترمیم او تنظیم، د بسته بندۍ اړوند میتودونو او نورو تخنیکي مهارتونو په برخه کې وروزل شي.
د کرنې ریاست مسؤلین وايي، تمه ده چې دا روزنه به د پنبې پروسس او بسته بندۍ په کیفیت او اغېزمنتیا کې د پام وړ بدلون راولي، او د بزګرانو اقتصادي وضعیت به ښه کړي.
د یادونې وړ ده چې دا پروګرام د کرنې او مالدارۍ سکتور د مسلکي پراختیا او اقتصادي ودې لپاره د روانو هڅو یوه برخه ده. چارواکي وايي، هڅه کوي چې د بزګرانو او سوداګرو د ظرفیت لوړولو لپاره ورته مسلکي پروګرامونه نور هم پراخ کړي.
