د ننګرهار د کرنې ریاست مازاد ملکیتونه په اجاره ورکول کېږي
۲۳ غویی ۱۴۰۴ ه.ش
۱۵ ذُو ٱلْقَعْدَةِ ۱۴۴۶ه.ق
د کرنې، اوبو لګولو او مالدارۍ وزارت د مالي او اداري رییس محمد اکبر امیني په مشرۍ یو پلاوی ننګرهار ولایت سفر وکړ، ترڅو د دې ریاست له مازاد جایدادونو څخه د سالمې استفادې او اجارې بهیر تنظیم کړي.
یاد پلاوي د ننګرهار د کرنې رییس مولوي محمد ولي محسن سره د ناستې پر مهال د هغو جایدادونو تثبیت او ارزونه وکړه چې دا مهال له فعاله استفادې پاتې دي.
ښاغلي امیني وویل، چې وزارت پلان لري د مرکز په ګډون د هېواد په ټولو ولایتونو کې د کرنې ادارې هغه ملکیتونه چې اوس ترې استفاده نه کېږي، د اجارې له لارې عواید ته واړوي. نوموړي زیاته کړه:«د دې اقدام موخه دا ده چې له بیکاره او شاړو ځمکو څخه سالمه، قانوني او مؤثره استفاده وشي، او همداراز د کرنې وزارت مالي عواید لوړ شي.»
د ننګرهار د کرنې رییس مولوي محمد ولي محسن د وزارت دا نوښت یو مثبت او اقتصادي ګام وباله او ډاډ یې ورکړ چې د مازاد ملکیتونو تثبیت، ترتیب او اجارې بهیر کې به له مرکز سره هر اړخیزه همکاري کوي.
دا هڅه د کرنې وزارت د نوې ستراتیژۍ یوه برخه ده، چې له شتو سرچینو اعظمي استفاده وکړي او د پایدارو عوایدو لاره هواره کړي.
