لغمان کې د کرنې اومالدارۍ سکټور متشبثینو او بزګرانو ته اسلامي مالي چوپړتیاوې وړاندې کېږي

 ۲ غویی ۱۴۰۴ ه‍.ش
۲۴ شَوّالُ المُکَرَّم ۱۴۴۶ه‍.ق
د لغمان دکرنې، اوبولګولو او مالدارۍ ریس مولوی عبدالستار محمد د کرنیزې پرمختیا صندوق «اې،ډي،اف» له رییس انجنیر عبدالغفور غفاري سره د خپل کار په دفتر کې وکتل او په دې ولایت کې بزګرانو، فارم لرونکو او د کرنې اومالدارۍ سکټور متشبثینو ته د اسلامي مالي چوپړتیاوو پر وړاندې خبرې اترې وکړې.
په دغه ناسته کې، د لغمان دکرنې رییس مولوی عبدالستار محمد او د کرنیزې پرمختیا صندوق رییس انجنیرعبدالغفور غفاري ترڅنګ یوشمېرکروندګر، فارملرونکي او د کرنیزو اتحادیو مسؤلینو هم حضور درلود.
د کرنیزې پرمختیا صندق رییس انجینرعبدالغفور غفاري وویل:«هغه کروندګر، فارملرونکي او نور کرنیزو اتحادیو کاروباریان، چې د لغمان د کرنې ریاست سره ثبت او راجستر وي، د یاد دفتر له لوري د مرابحې له مخې د دوی د کارو بار د تقوي لپاره نغدې پیسې ورکول کېږي او په دغو پیسو به د اړتیا وړ توکي دوي ته خریداري کوي، څو کاروباریان پرې خپل کاروبار پراخ  کړي.»
هغه زیاته کړه، چې دغه پیسې به په قسط وار ډول بیرته یاد دفتر ته سپارې. ددغه راز ښاغلي غفاري د یادې پروسې ټوله کړنلاره ګډونوالو ته تشریح او د دوی نظرونه یې واوریدل.
په ورته مهال دکرنې، اوبولګولو او مالدارۍ رییس مولوي عبدالستار محمد د پورنو د ورکړې سیستم د کرنیز سکتور د پراختیا په برخه کـې ډیرګټور وبله،او د کرنیزو ټولنو مسؤلین یې وهڅول، چې په یاده پروسه کې ګډون وکړي، دغه راز نوموړي راغلي پلاوي ته د پوره همکاري ډاډ ورکړ.
په دغه ناسته کې دغه راز فارملرونکو، کروندګراو د کرنیزو ټولنو مسؤلینو هم خپل نظرونه او غوښتنې شریکې کړې.