هلمند کې شخوند وهونکو څارویو ته د طاعون واکسین کمپاین پیل شو

د هلمند ولایت د کرنې، اوبو لګولو او مالدارۍ ریاست لخوا د کوچنيو شخوند وهونکو څارویو د طاعون ناروغۍ پر وړاندې د واکسین د وېش او تطبیق کمپاین په رسمي ډول پرانیستل شو.
دا پروګرام د هلمند ولایت د کرنې، اوبو لګولو او مالدارۍ ریاست استازو، د ملګرو ملتونو د کرنې او خوړو نړۍوالې ادارې د مسولینو، د مالدارۍ آمریت کارکوونکو او د سیمه ییزو وترنري کلینیکونو چارواکو په شتون کې ترسره شو.
ددې کمپاین په ترڅ کې د مارجې ولسوالی دوه زره څارویو ته د طاعون پر وړاندې واکسین پلي شوي او په نورو ولسوالیو کې هم دوام لري.
د دې واکسین د تطبیق موخه د ناروغۍ د خپریدو مخنیوی، د څارویو د مړینې کمول او د هلمند ولایت د مالدارانو د اقتصاد ملاتړ کول دي.
دا پروګرام د کرنې، اوبو لګولو او مالدارۍ وزارت د هغو هڅو یوه برخه ده چې په هېواد کې د څارویو روغتیا ښه کولو او د څارویو پیاوړتیا او لوړ محصولاتو د تولید په موخه ترسره کېږي.
په ورته مهال سیمه ییزو مالدارانو د دې اقدام هرکلی کړی او له مسؤلینو یې مننه کړې، چې د دوی حیوانات یې له احتمالي ناروغیو ژغورلي دي.