بلخ کې د سویابینو تخمونو اړوند مشورتي غونډه ترسره شوه
۲۵ وری ۱۴۰۴ ه.ش
۱۶ شَوّالُ المُکَرَّم ۱۴۴۶ه.ق
د بلخ ولایت د کرنې، اوبو لګولو او مالدارۍ ریاست په تالار کې د دې ریاست د رییس الحاج حافظ محمد موسی مبین په مشرۍ د سویابینو تخمونو په اړه مشورتي غونډه جوړه شوه.
په غونډه کې د مفید ګروپ رییس پاینده محمد خان او د کرنې ریاست ټولو کارکوونکو ګډون درلود. د غونډې پر مهال د سویابینو د تخمونو د کیفیت، تصدیق او لابراتواري ازموینو اړوند بحثونه وشول.
د بلخ د کرنې رییس ټولو ګډونوالو ته سپارښتنه وکړه چې بزګرانو ته باید یوازې تصدیق شوي او لابراتواري ازمویل شوي تخمونه وړاندې شي، څو د کرنیزو محصولاتو کیفیت لوړ شي او بزګران له ممکنه ستونزو خوندي پاتې شي.
سویابین د مغذي حبوباتو له ډلې څخه دی، چې د خوراکي اړتیاوو د پوره کولو ترڅنګ، د بزګرانو لپاره یوه ارزښتناکه تجارتي کښت هم ګڼل کېږي. د کرنې ریاست هڅه کوي د باکیفیته تخمونو له لارې د کرنیزو حاصلاتو کچه لوړه او د بزګرانو عواید زیات کړي.
