د ننګرهار وادي کرنيز امارتي شرکت د زیتون بڼونو د ساتنې په موخه درمل شیندنه ترسره کړه
د ننګرهار وادي کرنيز امارتي شرکت د دویم فارم په زیتون بڼونو کې د مضره حشراتو او نباتي ناروغیو د مخنیوي لپاره درمل شیندنه کړې. دغه اقدام د حاصلاتو د زیاتوالي او د زیتون ونو د ساتنې په موخه ترسره شوی دی.
د ننګرهار وادي کرنيز امارتي شرکت د بوټو ساتنې امریت په نوښت، د یاد شرکت اړوند د دویم فارم په زیتون بڼونو کې د مضره حشراتو او نباتي ناروغیو د مخنیوي لپاره درمل شیندنه ترسره کړه.
یاد اقدام د دې لپاره شوی، چې زیتون ونې له آفتونو، په ځانګړي ډول د سیلا حشرې او نورو نباتي ناروغیو څخه خوندي پاتې شي او په راتلونکي فصل کې سالم او لوړ حاصل ورکړي.
چارواکي وايي، دا درمل شیندنه د کرنیزو محصولاتو د خوندیتوب لپاره یوه مهمه مرحله ده، چې له امله به یې د زیتون بڼونو کیفیت او حاصلات ښه شي.
زیتون یو له ارزښتناکو کرنیزو حاصلاتو څخه ګڼل کېږي، چې د بازار تقاضا یې ورځ تر بلې زیاتیږي. د نباتي آفتونو او ناروغیو پر ضد وخت پر وخت درمل شیندنه د حاصل د ساتنې او زیاتوالي لپاره اړینه ګڼل کېږي. د کرنې متخصصین باور لري چې دا ډول اقدامات به د کرنیزو بڼونو د ودې او دوام لپاره مهم رول ولوبوي.
