د هلمند دکرنې ریاست اړوند څېړنیز فارم کې د پسرلنیو کرنیزو فعالیتونو چټک بهیر دوام لري
د هلمند ولایت د کرنې، اوبولګولو او مالدارۍ ریاست اړوند د څېړنو لوی مدیریت له لوري د بولان څیړنیز فارم کې د پسرلنیو کرنیزو فعالیتونو لړۍ پیل شوې ده.
د هلمند دکرنې ریاست چارواکي وایي، چې د یاد فارم په سیمه کې د لیګومي او صنعتي نباتاتو لکه ممپلۍ، کنځلې، لمر ګل، لوبیا او پنبې کرنه د پلان له مخې عملي شوې ده.
همدارنګه، د سبو په برخه کې لکه بنډۍ، بانجان، رومیانو او پیازو کرکیله هم له پلان سره سم ترسره شوې ده.
په ورته مهال، د مېوو برخه کې د انارو او انګورو د قوریو خشاوه چارې روانې دي، ترڅو دبڼوالۍ سکتور ته لا پراختیا ورکړل شي.
بلخوا، د انګورو بڼونو کې د کوپراویټ بلو درملو استعمال دوام لري، چې موخهیې د حاصل خوندیتوب او د آفتونو مخنیوی دی.
باید وویل شي، چې دا فعالیتونه به د سیمې د کروندګرو لپاره د نوېو تجربو او عملي زدهکړو لپاره یوه مهمه سرچینه وي، او په راتلونکې کې به د لا غوره حاصل د ترلاسه کولو زمینه برابره شي.
