لوګر کې د ریښه لرونکو چنارو ننداریزې کروندې جوړېږي
۶ وری ۱۴۰۴ ه.ش
۲۶ رَمَضانُ المُبارَک ۱۴۴۶ه.ق
د لوګر دکرنې، اوبولګولو او مالدارۍ ریاست چارواکي وایي، چې ددې ولایت په مرکز پل علم او ولسوالیو کې په ۲۵ جریبه ځمکه د چنارو ننداریزې کروندې جوړېږي.
د یادو کروندو د نیالونو او کاري وسایلو وېش غونډه کې د لوګر ولايت مرستیال والي مولوی محمد انور دین پرور سربیره د یاد ولایت د کرنې، ابولګولو او مالدارۍ رییس مولوي شیر آقا «پیر حبيب الرحمن» د کرنې او مالدارۍ رياست ځینو آمرینو او بزګرانو ګډون کړی وو.
د غونډې په پیل کې د لوګر د کرنې، ابولګولو او مالدارۍ رییس وویل، چې دغه ننداریزې کروندې د لوګر ولایت په مرکز او پنځو ولسوالیو کې جوړېږي، چې په ترڅ کې به یې د چنارو ۳۳ زره او ۲۵۰ نیالګي کښېنول شي.
د لوګر دکرنې رییس زیاته کړه، چې ددې پروسې په ترڅ کې د یو جریب ځمکې لپاره هر بزګر ته ۱۳۳۰ د چنارو نیالګي او اړین کاري توکي ورکول کېږي.
د لوګر دکرنې رییس په خپلو خبرو کې له دې مرستې پرخمن شویو بزګرانو څخه غوښتنه وکړه، چې د یادو وېشل شویو چنارونو ساتنه وکړي او د ناروغیو او وچ کېدو نه يې وساتي.
په همدې حال کې د لوګر ولايت مرستیال والي مولوي محمد انور «دین پرور» د نیالګیو د ارزښت په اړه خبرې وکړی او ترڅنګ يې له بزګرانو څخه غوښتنه وکړه، چې د یاد نهالونو د حفاظت په برخه کې تر خپل وسه پورې هلې ځلې وکړي.
د لوګر دکرنې ریاست د چارواکو په خبره د یادې پروژې مالي لګښت نږدې ۸۰۰ زره افغانۍ کېږي، چې د کرنې، اوبولګولو او مالدارۍ وزارت د طبیعي سرچینو لوی رياست لخوا ورکول شوې ده.
باید وویل شي، چې له دې وړاندې د لوګرد کرنې او مالدارۍ ریاست په هڅو د لوګر بزګرانو د اشر په لړ کې په بې سارې توګه د قوشتېپې کانال د زرغونتیا په موخه ۲۱۵ زره د چنارو او سنځلو قلمې راټول او د چارو ادارې استازو ته یې د انتقال په پار سپارلی وو.
