د کندهار کوهکران څېړنیز فارم کې د سبو کرنیزې څېړنې پیل شوې

۳ وری ۱۴۰۴ه‍.ش
۲۳ رَمَضانُ المُبارَک ۱۴۴۶ه‍.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د کوهکران څېړنیز فارم مسلکي انجنیرانو د یاد فارم په یوه جریب ځمکه کې د سبو کرنیزې څېړنې پیل کړې،چې دغو څېړنو په ترڅ کې به بېلابېل سابه تر علمي څېړنې لاندې ونیول شي.
یادې څېړنې د وري میاشتې په لومړیو کې پیل شوې، چې پکې مختلف ډوله سابه، له ډلې لس ډوله رومیان، پالک، بینډۍ، مرچ، ترهتیزک او یو شمېر نور سابه څېړل کېږي. دا څېړنې به د روان کال په وږي میاشت کې بشپړې شي.
د غو څېړنو پر مهال به د سبو د کرنې مهم عوامل؛ د قطارونو ترمنځ فاصله، د کرلو تخم اندازه، د سرې کارونه، د اوبو لګولو وختونه، د ناروغیو او آفتونو تشخیص، او د حاصلاتو کیفیت څېړل کېږي. د څېړنې په پایله کې به د تخمونو وزن معلوم او په ځانګړو کڅوړو کې ځای پر ځای شی، چې وروسته به د کرنې وزارت ته واستول شي. د کرنې وزارت مسؤلین به د دغو تخمونو پایله تحلیل کړي او د هېواد د نورو ولایتونو له حاصلخېزو تخمونو سره یې پرتله کړي..
باید وویل شي، چې د کندهار دکرنې ریاست د کوهکران څېړنیز فارم مسلکي او فني مسؤلین تل هڅه کوي، چې د سبو، مېوو، تېلي او صنعتي نباتاتو بېلابېل ډولونه او ورایټۍ (نوعي) وڅېړي، ترڅو د بزګرانو لپاره ارزښتناک نباتات وپېژني او ترویج یې کړي.