د کندهار معروف ولسوالی کې د بادامو لسګونه بڼونه جوړېږي
۳ وری ۱۴۰۴ه.ش
۲۳ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست په هلو ځلو، د ملګرو ملتونو دخوړو او کرنې ادارې په مالي او د «او،اچ،ډبلیو» مؤسسې په تخنیکي همکارۍ ددې ولایت د معروف په ولسوالی کې ۵۵ اړمنو بڼوالو ته پر ۵۵ جریبه ځمکه د بادامو بڼونو جوړولو په پار پر یادو بڼوالو د بادامو نیالګیو وېش لړۍ پیل کړ.
یاد بڼونه د مسلکي انجنیرانو له لوري د معروف ولسوالی په بېلابېلو سیمو کې پر ۵۵ جریب ځمکه جوړېږي، چې له مخې به یې هر بزګر ته پر یوه جریب ځمکه د ۱۱۴ نیالګیو څخه یو د بادام بڼ جوړ شي.
همداراز، د یادو بڼونو د ښه، اساسي او پایداره جوړښت لپاره، بڼوالو ته وړاندې عملي او نظري روزنه هم ورکړل شوې وه، چې په دې روزنه کې بڼوالو ته د ځمکې منظم چمتووالی، د نیالګیو منظم اېښودل، د نیالګیو د کتارونو ترمنځ د مناسب فاصلي پرېښودل، د اوبو د منظم سیستم رامنځته کول، او ورته اړینې سپارښتنې شوې وې، ترڅو بڼونه یې په ښه توګه وده وکړي.
د دغو بڼونو جوړولو موخه د بزګرانو اقتصادي ملاتړ، د بادام میوې بڼونو ته پراختیا او وده، د بزګرانو ځان بسیاینه، او د هغوی لپاره د کار زمینې برابرول دي.
د یادونې وړ ده، چې تېره اوونۍ هم په معروف ولسوالی کې ۱۰ تنه اړمنو بزګرانو ته د آیته انګورو د بڼونو جوړولو په موخه هر بزګر ته ۳۳۳ نیالګي وېشل شوې وې، ترڅو په یاده ولسوالیو کې د آیته انګورو کرنې او پراختیا ته لا هم لاره هواره شي.
