د کندهار دامان ولسوالی کې لسګونو مالدارانو ته کرنیز توکي او تخمونه ووېشل شول
۳۰ کب ۱۴۰۳ه.ش
۲۰ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅه، د اروپایي ټولنې په مالي ملاتړ او د افغانستان لپاره د هالنډ کمیټې په تخنیکي همکاري، د دامان په ولسوالی کې ۲۵ اړمنو بزګرانو ته د څارویو مناسبې او ښه تغذيې برابرولو په موخه د رشقې اصلاح شوې تخم، کیمیاوي توره او سپینه سره او کرنیز توکي ووېشل شول.
د یادې مرستي د لا ښه عادلانه وېش او رڼتیا لپاره یوه اوونۍ وړاندې د کندهار د کرنې ریاست سره په همغږۍ او د دامان ولسوالی مسؤلینو په کډه ملتیا د مستحق کسانو نوم لیکنه ترسره شوه، چې اوس مهال هر مالدار ته شپږ قلمه توکې ووېشل شوه، چې پکې ۴ کیلو د رشقې اصلاح شوې تخم، ۵ کیلو توره او ۱۲ کیلو سپینه سره، یوه بیلچه، ښاخي او یوه لوحه شامل دي.
د دې مرستې څخه موخه د اصلاح شویو تخمونو دودول او اصلاح شوې تخمونو ته پراختیا ورکول، له کمې ځمکې څخه زیات حاصل لاسته راوړل، د مالدارانو لپاره اړینې چوپړتیاوې برابرول، د څارویو لپاره د ښه او مناسب تغذيه برابرول دي او د مالدارانو مالي ملاتړ دي.
د یادونې وړ ده، چې د کندهار د کرنې، اوبو لګولو او مالدارۍ ریاست په دې وروستیو کې د کرنې او مالدارۍ په برخه کې د بزګرانو او مالدارانو لپاره اړینې چوپړتیاوې برابرې کړي، چې په همدې لړۍ کې یې یوه میاشت وړاندې هم د اروپایې ټولنې په مالي او د هالنډ کمیټې په تخنیکي همکاري د چنجیو ضد ناروغیو پر وړاندې د ۳۰ زره څارویو درملنه کړې وه.
