ننګرهار کې ۵۰ بزګرانو ته د کرنيزو عمليو تر سره کولو په موخه روزنه ورکړل شوه
۳۰ کب ۱۴۰۳ه.ش
۲۰ رَمَضانُ المُبارَک ۱۴۴۶ه.ق
د ننګرهار د کرنې، اوبو لګولو او مالدارۍ رياست د کرنيزو مدیريتونو کار کوونکو له لوري په سره رود، کوټ، اچین، لعلپورې او شینوارو ولسوالیو کې ۵۰ بزګرانو ته د ناروغيو مخنيوي او غوره کرنيزو عمليو تر سره کولو په موخه روزنه ورکړل شوه.
په دغو ولسوالیو کې بزګرانو ته د ګندنې، پالکو، غنمو او مېوه لرونکو ونو ناروغیو مخنیوي، کرنیزو عملیو، حاصل ټولولو، هرزه وښو مخنیوي او افاتو د هراړخیز کنټرول په موخه معلومات ورکړل شول .
دغه راز په يادو ولسوالیو کې بزګرانو او بڼوالو ته په بڼونو کې د نرمکارۍ، اوبو لګولو، سرې استعمال، د ونو د تنو سپینول، د ناروغیو د کنترول بیوژیکي درملنه، شنوخونو کې د کرنې ارزښت، د درملو ګټو، زیانونو او ګڼو نورو برخو کې پوهاوی وشو.
د ننګرهار د کرنې، اوبولګولو او مالدارۍ ریاست هڅه کوي، د خپلو متخصصینو پر مټ بزګرانو او بڼوالو ته د ناروغیو او افاتو په اړه پر وخت معلومات وړاندې ترڅو د ناروغیو مخنیوي وشي او بزګران له زیانونو وژغورل شي.
