پکتیکا کې د جلغوزې او غوزانو کورني قوریې جوړیږي

۱۰ لېندۍ ۱۳۹۸
د پکتیکا د کرنې، اوبولګولو او مالدارۍ ریاست د دې ولایت د طبیعي ځنګلونو د خوندي کولو او بیا رغونې په پار هلې ځلې کړندي کړي دي، په همدې موخه ددې ولایت په پنځو ولسوالیو «ګیان، زېړوک، سروبي، سروضه او اورګون» کې د جلغوزیو او چهارمغزو د ځنګلونو د بیارغولو په پار د کورنیو قوریو د جوړولو د پروژو چارې رسماً پیل شوې.
د پکتیکا د کرنې، اوبولګولو او مالدارۍ ریاست وایي، چې دوی په دې ولایت کې د جلغوزیو او غوزانو «چهارمغزو» د ځنګلونو د بیارغونې په پار هلې ځلې کوي او د دغو ځنګلونو د بیارغونې په پار یو شمېر قوریه لرونکو ته روزنیز پروګرامونه هم جوړ کړي او ترڅنګ یې په دې ولایت کې د جلغوزې او غوزانو کورني قوریې هم جوړوي. د یادو چارواکو په خبره ددې ولایت په پنځو ولسوالیو کې د جلغوزو او چهارمغزو ۳۵۶ کورني قوریې جوړیږي، چې په راتلونکو درو کلونو کې به له یادو قوریو څخه د جلغوزې او چهارمغزو دوه میلیونه او ۱۰۰ زره نیالګي تولید شي.
پکتیکا د افغانستان د جلغوزیو او چارمغزو د ځنګلونو له برخمنو ولايتونو څخه دي، چې د دغو ځنګلونو یوه برخه له منځه تللې، خو اوس د کرنې وزارت د جلغوزیو ځنګلونو د بيا رغونې په هڅه کې دي.