د خوست علیشېر او تریزیو ولسوالی کې لسګونه بڼونه جوړېږي
د خوست د کرنې، اوبو لګولو او مالدارۍ ریاست په هڅو «ان،اې،سي» کمېټې په تخنیکي همکارۍ د خوست ولایت د علیشېر او تریزیو په ولسوالی کې یوشمېر بزګرانو ته د املوکو، توتانو او چهارمغزو متراکم بڼونه جوړېږي.
د خوست د کرنې، اوبو لګولو او مالدارۍ ریاست چارواکي وایي، چې یاد بڼونه د نشه یي توکو بدیلو پروګرامونو له لارې د دې ولسوالی د « کابل، ځدراڼو، سينځلۍ، للمۍ، پوښان او ځدرانو ميله» کلیو کې پلي کېږي او هڅه کوي د نشه یي توکو مخنیوي په موخه لوړ حاصل ورکوونکي (متراکم ) نور بڼونه هم جوړ کړي.
ددې پروژې په ترڅ کې ددې ولسوالی د یادو کلیو پر ۵۰ بزکرانو د املوکو، توتانو او چهارمغزو ۱۵ زره او ۱۲۰ نیالګي وېشل شوي، چې په کې ۱۱۳۹۸ د املوکو، ۲۲۳۴ د توتانو او ۱۴۸۸ د چهارمغزو نیالګي شامل دي.
دغه راز یادو بڼوالو ته په بڼونو د کرنیزو عملیو ترسره کولو، اوبو لګولو، سرې استعمال، هرزه وښو کنټرول او نورو اړونده برخو کې عملي او نظري روزنه هم ورکړل شوې ده او په راتلوونکي کې به هم د حاصل ټولولو، بسته بندۍ، سورت بندۍ او نورو برخو کې روزنه ورکړل شي.
