ننګرهار کې د ناکو او آلوچو بڼونه جوړېږي
د ننګرهار د کرنې، اوبو لګولو او مالدارۍ ریاست په هڅو د اکشن اېډ مؤسسې په تخنیکي همکارۍ او د ملګرو ملتونو د خوړو او کرنې ادارې په مالي لګښت د ننګرهار په خوږیاڼو او کوزکونړ ولسوالېو کې بڼوالو ته د آلوچو او ناکو ۱۱ زره او ۹۰۰ نیالګیو کېنولو چارې پیل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې یاد بڼونه د نشه یي توکو بدیلو پروګرامونو له لارې پلي کیږي او هڅه کوي د نشه یي توکو مخنیوي په موخه لوړ حاصل ورکوونکي (متراکم ) نور بڼونه هم جوړ کړي.
نوموړې وویل، چې دبڼونو کرلو لپاره یي هر بڼوال ته ۷۰۰ نیالګي ورکړل شول او په نږدې راتلوونکي کې به په بڼونو کې د پایو او لینونو نصبولو چارې هم پیل شي.
دغه راز یادو بڼوالو ته په بڼونو د کرنیزو عملیو ترسره کولو، اوبو لګولو، سرې استعمال، هرزه وښو کنټرول او نورو اړونده برخو کې عملي او نظري روزنه هم ورکړل شوې ده او په راتلوونکي کې به هم د حاصل ټولولو، بسته بندۍ، سورت بندۍ او نورو برخو کې روزنه ورکړل شي.
