ننګرهار وادي کرنيز امارتي شرکت د زیتون حاصلات زیات شوي 

۱۱ کب ۱۴۰۳ه‍.ش
۱ رَمَضانُ المُبارَک۱۴۴۶ه‍.ق
د ننګرهار وادي کرنيز امارتي شرکت د سوداګرۍ او بازار موندنې رئيس انجنیر ندي الله نیازي تېره ورځ په یوه خبري کنفرانس کې وویل، چې یاد شرکت د ۱۴۰۳ مالي کال په ترڅ کې شاوخوا ۱زر او ۱۰۰ ټنه د زیتون دانو حاصلات راټول کړي دي. تر دې دمه له دې حاصلاتو څخه ۱۳۵ زره لیتره د زیتون تېل او ۳۰ ټنه اچار تولید شوی او لا هم د تولید بهیر دوام لري، چې له امله به دا شمېر نور هم لوړ شي.
نیازي زیاته کړه، چې د شرکت د تولیداتو کیفیت ښه شوی او دا مهال د زیتون په کارخونه کې ۴.۵ ټنه نوی تیلي اچار هم تولید شوی، چې د ننګرهار په بازارونو کې یې ښه تقاضا پیدا کړې ده.
د نوموړي په وینا، د ننګرهار کانال ۷۱ کیلومتره اوږدوالی لري، چې ۳۱ زره هکتاره کرنیزې ځمکې خړوبولو ظرفیت لري. له دې ډلې څخه شاوخوا ۱۱ زره او ۴۰۰ هکتاره د کانال اړوند فارمونه دي او پاتې یې شخصي ملکیتونه دي.
د ننګرهار وادي کرنيز امارتي شرکت مسوولین وايي، چې د زیتونو د تولید، پروسس او بسته‌بندۍ د پراخولو لپاره یې هڅې روانې دي. د همدې لړۍ په ترڅ کې د فابریکې د احاطې دیوال د جوړولو چارې پیل شوي، څو د تولید ظرفیت لوړ شي او د داخلي بازارونو ترڅنګ بهر ته هم د زیتون محصولات په پراخه کچه صادر شي.