لوګر کې بڼوالو لپاره د لایم سلفر ترکيبي درمل تطبیق او عامه پوهاوی پیل شو
۵ کب ۱۴۰۳ه.ش
۲۴ شَعبان المُعَظّم ۱۴۴۶ه.ق
د لوګر ولایت د کرنې، اوبولګولو او مالدارۍ ریاست د بوټو ساتنې عمومي مدیریت تخنیکي ټیم، د کرنې وزارت په منظورۍ، د دوو ولسوالیو لپاره د لایم سلفر ترکيبي درمل تطبیق او عامه پوهاوی عملاً پیل کړ.
دغه پروګرام د لوګر ولایت له ازرې ولسوالۍ څخه پیل شو، چې پکې سلګونو بڼوالو ته د یاد تخنیکي ټیم له لوري د لایم سلفر ترکيبي دوا د جوړولو طریقه، د کارونې مناسب وخت، ګټې او زیانونه، د آفتونو او ناروغیو د کنټرول لارې چارې توضیح شوې او همداراز، یاده ترکيبي درمل بڼوالو ته ووېشل شوه.
بڼوالو په دې پروګرام کې په ډېرې علاقې ګډون کړی و او د کرنې ریاست څخه یې د ورته نورو پروګرامونو د دوام غوښتنه وکړه.
